የደቡብ ኮሪያው የመኪና አምራች ኪጂኤም በኢትዮጵያ የኤሌክትሪክ መኪናዎች ኖክዳውን መገጣጠሚያ ፋብሪካ ሊገነባ መሆኑ ተገልጿል። ኩባንያው በቀጣዩ ዓመት መጀመሪያ አጋማሽ ምርት እንደሚጀምር የሚጠበቅ ሲሆን፣ የሚመረቱት መኪናዎች ወደ ተለያዩ የምሥራቅ አፍሪካ ገበያዎች ይላካሉ ተብሏል።
ኪጂኤም የመኪና መገጣጠሚያ ሥራውን ለማቋቋም ከቢ ኤንድ ሲ እና ዮንግሳን ግሎኔት ጋር ከሦስት ቀናት በፊት የመግባቢያ ስምምነት ተፈራርሟል።
ግንባታው በጥቅምት ወር እንዲጀመር የታቀደ ሲሆን፣ በመጀመሪያ ደረጃ በዓመት ወደ አንድ ሺህ የሚጠጉ መኪናዎችን ያመርታል። ከሚመረቱት ሞዴሎች መካከል ኪጂኤም ቶሬስ ኢቪኤክስ እና ሙሶ ኢቪ ይገኙበታል።
በስምምነቱ መሠረት፣ ቢ ኤንድ ሲ የፋብሪካውን ቦታና መሠረተ ልማት የማዘጋጀትና የግንባታ ሥራውን የመቆጣጠር ኃላፊነቱን ይወስዳል። ዮንግሳን ግሎኔት ደግሞ የፋብሪካ ዲዛይን፣ የምህንድስናና የቴክኒክ ድጋፍ እንዲሁም የምርት መሣሪያዎችን ያቀርባል። ኪጂኤም በኢትዮጵያ ለመገጣጠም መኪናዎቹንና የመኪና እቃዎችን ያቀርባል።
በኢትዮጵያ የሚገጣጠሙት መኪናዎች ለሀገር ውስጥ ገበያ ከማቅረብ በተጨማሪ ወደ ሶማሊያ፣ ኬንያ፣ ኡጋንዳ፣ ሩዋንዳ እና ጅቡቲ ይላካሉ ተብሎ ይጠበቃል። ይህም ኢትዮጵያን ለኪጂኤም በምሥራቅ አፍሪካ የምርትና የወጪ ንግድ ማዕከል ለማድረግ ያለመ ነው።
