ካራካስ / ኒው ዮርክ — የቴክኖሎጂው ቢሊየነር ኢሎን መስክ፣ ኒኮላስ ማዱሮ በአሜሪካ ድንገተኛ ጥቃት ተይዘው ኒው ዮርክ ፍርድ ቤት መቅረባቸውን ተከትሎ፣ የስታርሊንክ (Starlink) የሳተላይት ኢንተርኔት አገልግሎት በቬንዙዌላ በነፃ እንዲሰጥ ትዕዛዝ አስተላልፏል።
እንደ ስታርሊንክ መግለጫ ከሆነ፣ በቬንዙዌላ የሚገኙ ተጠቃሚዎች እስከ ጥር 25 ቀን 2026 ድረስ ያለምንም ክፍያ የብሮድባንድ ኢንተርኔት አገልግሎት ማግኘት ይችላሉ። ይህ እርምጃ የተወሰደው ሀገሪቱ በፖለቲካዊ ሽግግር ላይ ባለችበት እና በተለያዩ አካባቢዎች የኢንተርኔት እና የመገናኛ መቆራረጦች ባሉበት ወቅት መረጃ እንዳይጠፋ ለማድረግ ነው።
“ለቬንዙዌላ ህዝብ ድጋፍ”
ኢሎን መስክ በራሱ የኤክስ (X) ገጽ ላይ ባስተላለፈው መልዕክት “ይህ አገልግሎት ለቬንዙዌላ ህዝብ ድጋፍ እንዲሆን ነው” ብሏል። ማስክ ከዚህ ቀደም ከማዱሮ አገዛዝ ጋር ከፍተኛ የቃላት ጦርነት ውስጥ የነበረ ሲሆን፣ አሁን ማዱሮ በቁጥጥር ስር መዋላቸውን ተከትሎ “ቬንዙዌላ የሚገባትን ብልጽግና የምታገኝበት ጊዜ ደርሷል” ሲል በስፓኒሽ ቋንቋ ደስታውን ገልጿል።
ስታርሊንክ ቀደም ሲል በቬንዙዌላ በይፋ አገልግሎት ባይጀምርም፣ አሁን ግን በሀገሪቱ ውስጥ ያሉ የሳተላይት መቀበያ መሣሪያዎች በሙሉ በነፃ አገልግሎት እንዲያገኙ (Service Credits) ተደርጓል። ይህም ዜጎች፣ የጤና ተቋማት እና ጋዜጠኞች ከመንግስት ቁጥጥር ውጭ በሆነ መንገድ መገናኘት እንዲችሉ ይረዳቸዋል።
ይህ የኢሎን መስክ እርምጃ፣ ቀደም ሲል በዩክሬን ጦርነት ወቅት ካደረገው ድጋፍ ጋር ተመሳሳይ ሲሆን፣ ስታርሊንክ በዓለም አቀፍ ፖለቲካዊ ቀውሶች ወቅት ወሳኝ የመገናኛ አማራጭ መሆኑን በድጋሚ አሳይቷል።
