ዓለም አቀፉ የከፍተኛ ትምህርት ተቋማት ደረጃ መመዘኛ (QS World University Rankings) ባወጣው የ2026 አዲስ መረጃ መሠረት የአዲስ አበባ ዩኒቨርሲቲ በምስራቅ አፍሪካ የሚገኙ ዩኒቨርሲቲዎችን በመብለጥ የአንደኝነትን ደረጃ መያዙ ተረጋገጠ።
ዩኒቨርሲቲው ይህንን ደረጃ ሊያገኝ የቻለው በምርምር ሥራዎቹ ጥራት በዓለም አቀፍ የትምህርት ትብብሮች በተመራቂ ተማሪዎቹ የሥራ ቅጥር ዕድል እና በትምህርት ጥራት መለኪያዎች ባሳየው ከፍተኛ መሻሻል እንደሆነ ተገልጿል። ይህም ተቋሙ በቅርቡ የጀመረውን ራሱን በራሱ የማስተዳደር (Autonomous) ጉዞ ስኬታማነት የሚያሳይ ትልቅ ማሳያ ተደርጎ ተወስዷል።
ቀደም ሲል በምስራቅ አፍሪካ ቀዳሚ የነበረው የናይሮቢ ዩኒቨርሲቲን በመብለጥ አንደኛ መውጣቱ የአዲስ አበባ ዩኒቨርሲቲ በአህጉሪቱ ካሉ ምርጥ የትምህርት ማዕከላት አንዱ መሆኑን በድጋሚ አረጋግጧል። ዩኒቨርሲቲው በዓለም አቀፍ ደረጃም በደረጃ ሰንጠረዡ ላይ ከፍተኛ መሻሻል አሳይቷል።
የምስራቅ አፍሪካ ምርጥ ዩኒቨርሲቲዎች ደረጃ
እንደ ቢዝነስ ኢንሳይደር አፍሪካ ዘገባ አዲስ አበባ ዩኒቨርሲቲ በቀጣናው ያሉ ታዋቂ ተቋማትን በመብለጥ ቀዳሚነቱን ይዟል። ዝርዝር ደረጃው እንደሚከተለው ቀርቧል፦
- አዲስ አበባ ዩኒቨርሲቲ (ኢትዮጵያ)
- ማካሬሬ ዩኒቨርሲቲ (ዩጋንዳ)
- ናይሮቢ ዩኒቨርሲቲ (ኬንያ)
- ካርቱም ዩኒቨርሲቲ (ሱዳን)
ዩኒቨርሲቲው ይህንን ደረጃ ሊያገኝ የቻለው በዘፈቀደ ሳይሆን በተለይም በሂውማኒቲስ፣ ሶሻል ሳይንስ፣ ኢንጂነሪንግ እና ጤና ሳይንስ ዘርፎች ባከናወናቸው ጥራት ያላቸው የምርምር ሥራዎች እንደሆነ ተመላክቷል። ተቋሙ በአሁኑ ወቅት የተመሰረተበትን 75ኛ ዓመት የአልማዝ ኢዮቤልዩ እያከበረ የሚገኝ ሲሆን ይህ ስኬት ለበዓሉ ልዩ ድምቀት ሰጥቶታል።
አዲስ አበባ ዩኒቨርሲቲ ከቅርብ ጊዜ ወዲህ የጀመረው ራሱን በራሱ የማስተዳደር (Autonomy) የሪፎርም ሥራ በዓለም አቀፍ ደረጃ ያለውን ተወዳዳሪነት ከፍ አድርጎታል። ዩኒቨርሲቲው ካሉበት 10 ኮሌጆችና በርካታ የምርምር ተቋማት በተጨማሪ ከ300,000 በላይ ተማሪዎችን አስመርቆ ለሀገርና ለቀጣናው ልማት ከፍተኛ አስተዋጽኦ ማበርከቱ ለደረጃው በዋና መመዘኛነት ቀርቧል።
