ዱባይ “የወርቅ ከተማ” ዝናዋን የሚያድስ ግዙፍ የወርቅ ዲስትሪክት እና ልዩ የወርቅ ጎዳና ልትገነባ ነው

የተባበሩት ዓረብ ኤምሬትስ የንግድ ማዕከል የሆነችው ዱባይ በዓለም አቀፍ ደረጃ ያላትን “የወርቅ ከተማ” (City of Gold) ዝና ወደ ላቀ ደረጃ የሚያሸጋግር ግዙፍ የወርቅ ዲስትሪክት እና ልዩ የወርቅ ጎዳና (Gold Street) ልታለማ መሆኑን አስታወቀች።

ይህ በዓይነቱ ለየት ያለና ለዚሁ ዓላማ ተብሎ የሚገነባው ዲስትሪክት የችርቻሮ፣ የጅምላ ሽያጭ፣ የወርቅ ዝውውር እና የኢንቨስትመንት ሥራዎችን በአንድ ማዕከል የሚያሰባስብ ይሆናል። እንደ “ዱባይ ጎልድ ኤንድ ጄውለሪ ግሩፕ” (Dubai Gold & Jewellery Group) መረጃ መሠረት ማዕከሉ ከ1,000 በላይ የወርቅ፣ የጌጣጌጥ፣ የሽቶ፣ የውበት መጠበቂያዎች እና የተለያዩ የፋሽን ምርቶች መሸጫ ሱቆችን በአንድ ላይ ይይዛል።

በታሪካዊ የንግድ ስፍራዎች አቅራቢያ የሚገነባው ይህ አዲስ ፕሮጀክት በበርካታ ምዕራፎች ተከፋፍሎ የሚለማ ሲሆን የሚከተሉትን አገልግሎቶች ያካትታል እንደ ጃውሃራ (Jawhara)፣ አል ሮማይዛን (Al Romaizan)፣ ታኒሽቅ (Tanishq) እና ጆያሉካስ (Joyalukkas) ያሉ በዓለም ታዋቂ የጌጣጌጥ ድርጅቶች በማዕከሉ ለመገኘት ስምምነት ላይ ደርሰዋል።

ከዓለም ዙሪያ የሚመጡ ነጋዴዎችን እና ቱሪስቶችን ለማስተናገድ ከ1,000 በላይ ክፍሎች ያሏቸው ስድስት ዘመናዊ ሆቴሎች በዲስትሪክቱ ውስጥ ይገነባሉ። ማዕከሉ የንግድ ግብይት ብቻ ሳይሆን ዓለም አቀፍ የወርቅ ኢንቨስትመንት የሚመራበት ስልታዊ ቦታ እንዲሆን ታቅዷል።

ዱባይ በአሁኑ ወቅት በዓለም አቀፍ የወርቅ ንግድ ላይ ያላትን ድርሻ ለማሳደግ በቢሊዮን የሚቆጠር ዶላር ኢንቨስት እያደረገች ሲሆን ይህ አዲስ የወርቅ ጎዳና ከተማዋን የዓለም ጌጣጌጥ ንግድ መናኸሪያነቷን እንደሚያረጋግጥላት ተነግሯል። የማዕከሉን የምረቃ ቀን እና ዝርዝር መረጃዎች የዱባይ ኢኮኖሚ እና ቱሪዝም መምሪያ በቅርቡ ይፋ እንደሚያደርግ ይጠበቃል።