ከጅቡቲ ወደ የመን እየተጓዘ የነበረ ከ300 በላይ ስደተኞችን የያዘ ጀልባ በባሕር ላይ ተገልብጦ ቢያንስ 139 ሰዎች ሕይወታቸውን እንዳጡ የተባበሩት መንግሥታት የስደተኞች ድርጅት (IOM) አስታወቀ።
በአደጋው 84 ሰዎች እስካሁን የጠፉ ሲሆን፣ 82 ሰዎች ከአደጋው መትረፋቸው ተገልጿል። ከተረፉት መካከል ሁሉም የኢትዮጵያ ዜጎች መሆናቸውን የስደተኞች ድርጅቱ ገልጿል።
አደጋው በጅቡቲ ሰሜናዊ የባሕር ዳርቻ፣ ከኦቦክ ወደብ ከተማ በስተሰሜን በሚገኘው ጉሄሬ አካባቢ፣ ከመስከረም 26 ምሽት እስከ መስከርም 30 ንጋት ባለው ጊዜ መከሰቱን የተረፉ ሰዎች ለባለሥልጣናት ተናግረዋል።
በአደጋው ከሞቱት መካከል ሕፃናት እንዳሉ የተገለጸ ሲሆን የሟቾች ቁጥር ከዚህ በፊት ከተገለጸው 109 ወደ 139 ከፍ ብሏል። ይህም ተጨማሪ 30 አስከሬኖች ከተገኙ በኋላ መሆኑን ሪፖርቶች ያመለክታሉ።
የጅቡቲ ባለሥልጣናት ከስደተኞች ድርጅቱ ጋር በመተባበር የፍለጋና የማዳን ሥራዎችን እያካሄዱ ሲሆን፣ ከአደጋው የተረፉ ሰዎች የሕክምናና የሰብዓዊ ድጋፍ እያገኙ ነው።
ከኢትዮጵያና ከሌሎች የቀንደ አፍሪካ አገራት የሚነሱ በርካታ ስደተኞች በጅቡቲ በኩል ወደ የመን በመሻገር ወደ ሳዑዲ ዓረቢያና ሌሎች የባሕረ ሰላጤው አገራት ለመድረስ ይሞክራሉ።
በዚህ መንገድ የሚጓዙ ሰዎች የተሻለ የሥራ ዕድልና የኑሮ ሁኔታ ፍለጋ ጉዞውን የሚጀምሩ ቢሆንም፣ ከባድ የባሕር አደጋዎች፣ የሰው ዝውውር፣ ብዝበዛና ሌሎች አደጋዎች ያጋጥሟቸዋል።
የስደተኞች ድርጅቱ በ2025 ብቻ በዚህ የስደት መስመር ከ900 በላይ ሰዎች እንደሞቱ ወይም እንደጠፉ ያሳያል።
ድርጅቱ በተደጋጋሚ የሚከሰቱትን አደጋዎች ለመቀነስ ደህንነቱ የተጠበቀና ሕጋዊ የስደት መንገዶችን ማስፋፋት እንደሚያስፈልግ አሳስቧል።
