በኢትዮጵያ ወርቅን ጨምሮ የውድ ማዕድናት ማጣሪያ ተመርቆ ስራ ጀመረ

ጠቅላይ ሚኒስትር ዐቢይ አህመድ በዛሬው እለት  በቦሌ ለሚ ልዩ የኢኮኖሚ ቀጣና የተገነባውን ብሔራዊ የውድ ማዕድናት ማጣሪያ ፋብሪካ መርቀው ስራ ማስጀመራቸውን ፋና ዘግቧል።

በምረቃው ስነስርዓቱ ወቅት ጠቅላይ ሚኒስትሩ የፋብሪካው መገንባት ኢትዮጵያ ጥሬ እቃ ልካ በምትኩ የተሰሩ ምርቶችን በውድ የምታስገባበትን አካሄድ ለማስቀረት እንደሆነ ጠቅሰዋል።

ጥሬ ቡና ወደ ውጭ ተልኮ ታሽጎና ተቆልቶ በብዙ እጥፍ ተመልሶ የሚገዛበትን ውድ ዋጋ በአብነት አንስተዋል ጠቅላይ ሚኒስትር ዐቢይ።

ጠቅላይ ሚኒስትሩ ስራዎች በታቀደላቸው ጊዜ ተጠናቀው ለህዝብ ይፋ እንደሚሆኑ ይህን ፋብሪካ በምሳሌነት አንስተዋል።

ከዚህ ቀደም ኢትዮጵያ ወርቅ ስትልክ ያለማጣሪያ በመሆኑ 30 በመቶ የሚሆነው እንደ ቆሻሻ ተቆጥሮ ይቀነስ ነበር ያሉት ጠቅላይ ሚኒስትሩ ይህ ማጣሪያ ይህንን ችግር እንደሚቀርፍ ገልጸዋል።

ፋብሪካውም በዓመት እስከ 80 ቢሊየን ዶላር የሚደርስ ኤክስፖርት ማከናወን የሚያስችል ትልቅ አቅም ያለውና ከአፍሪካ ቀዳሚ ከሆኑት አንዱ ነው ተብሏል።