አሜሪካ በኤርትራ ላይ ጥላ የነበረውን ማዕቀብ አነሳች

የፕሬዝዳንት ዶናልድ ትራምፕ አስተዳደር በኤርትራ ገዢ ፓርቲ እና በወታደራዊ ተቋሙ ላይ ጥሎት የነበረውን ማዕቀብ ማንሳቱን የአሜሪካ ገንዘብ ሚኒስቴር አስታውቋል።

የጆ ባይደን አስተዳደር በ2014 ዓ.ም. ይህን ማዕቀብ የጣለው በኢትዮጵያ ትግራይ ክልል ተቀስቅሶ በነበረው ጦርነት ወቅት ተፈጽመዋል ከተባሉት የሰብዓዊ ድጋፍና የሰብዓዊ መብት ጥሰቶች ጋር በተያያዙ ስጋቶች ምክንያት ነበር።
ጦርነቱ በኢትዮጵያ ፌዴራል መንግሥት እና በትግራይ ሕዝባዊ ነፃነት ግንባር (TPLF) መካከል የተካሄደ ሲሆን፣ ከፍተኛ የሰው ሕይወት ጉዳት ከደረሰ በኋላ በአፍሪካ ሕብረት መሪነት በፕሪቶሪያ በተፈረመ የሰላም ስምምነት ቆሟል።

በጦርነቱ ወቅት የኤርትራ ኃይሎች የኢትዮጵያን መንግሥታዊ ኃይሎች በመደገፍ በጦርነቱ ከተሳተፉ በኋላ በሰብዓዊ መብት ጥሰቶች ተከሰው ነበር።

የገንዘብ ሚኒስቴሩ የውጭ ሀብት ቁጥጥር ጽሕፈት ቤት (OFAC) ትናንት ባወጣው መግለጫ፣ የኤርትራ ከፍተኛ የፋይናንስ ኃላፊ የሆኑት ሃጎስ ገብረሕይወትን ጨምሮ በርካታ የኤርትራ ግለሰቦች ከማዕቀቡ ዝርዝር መሰረዛቸውን ገልጿል።

በመንግሥት ባለቤትነት የሚተዳደረው የሬድ ሲ ትሬዲንግ ኮርፖሬሽንም ከዚህ ቀደም በማዕቀቡ ሥር ከነበሩት መካከል ይገኝ ነበር።

የኤርትራ የኢንፎርሜሽን ሚኒስትር የሆኑት የማነ ገብረመስቀል የትራምፕ አስተዳደር ያደረገውን እርምጃ በደስታ ተቀብለዋል።

የማነ ገብረመስቀል “በዚህ ረገድ በትራምፕ አስተዳደር የተወሰደውን የማስተካከያ እርምጃና በጎ እርምጃ እንቀበላለን” ሲሉ ለአሶሺየትድ ፕሬስ ተናግረዋል።

ይህ ማዕቀብ የተነሳው በቀይ ባሕር የደህንነት ስጋቶች እየጨመሩ ባሉበት ወቅት ነው። በየመን የሁቲ ኃይሎች በቅርቡ ያደረጉት እድገት በመርከብ መጓጓዣ ላይ የሚያጋጥሙ ስጋቶችን ጨምሯል። የኤርትራ ደቡባዊ የባሕር ዳርቻ እና የአሰብ ወደብ ደግሞ ቀይ ባሕርን ከኤደን ባሕረ ሰላጤ ጋር ከሚያገናኘው ስትራቴጂካዊ የባሕር መተላለፊያ የባብ ኤል-መንደብ አቅራቢያ ይገኛሉ።