የ2026 የአፍሪካ ኮሙኒኬሽን እና ሎጂስቲክስ ሲምፖዚየም (African Communications and Logistics Symposium) ከ40 በላይ ከሚሆኑ የአፍሪካ ሀገራት የተወከሉ የጦር ኃይሎች ከፍተኛ አመራሮች፣ የመከላከያ ባለሙያዎች እና የዘርፉ ተወካዮች በተገኙበት በዛሬው ዕለት ሐምሌ 20 ቀን 2018 ዓ.ም. በኢትዮጵያ መዲና አዲስ አበባ በይፋ መካሄድ ጀምሯል።
በኢትዮጵያ እና በአሜሪካ አዘጋጅነት ከሐምሌ 20 እስከ ሐምሌ 24 ቀን 2018 ዓ.ም. (July 27–31, 2026) ለተከታታይ አምስት ቀናት በሚቆየው በዚህ ታላቅ አህጉራዊ መድረክ ላይ በአፍሪካ የደህንነት እና የወታደራዊ ትብብር አቅምን ማጠናከር የሚያስችሉ ስልታዊ ጉዳዮች ላይ ውይይት ተጀምሯል።
በዛሬው የመክፈቻ ውይይቶች አህጉራዊ የመከላከያ እና የደህንነት ተቋማት አቅምን ለማጎልበት በሚያስችሉ አራት ዋና ዋና የትኩረት መስኮች ላይ ምክክር ተደርጓል።
- የሎጂስቲክስ አቅምን ማጠናከር (Strengthening Logistics)፦ በአህጉሪቱ በሚካሄዱ የሰላም ማስከበር እና የደህንነት ማስበር ስራዎች ወቅት የሎጂስቲክስ እና የቁሳቁስ አቅርቦት ፍሰትን በብቃት መምራት።
- አስተማማኝ የኮሙኒኬሽን ስርአት (Secure Communications)፦ በወታደራዊ ክፍሎች መካከል ሚስጥራዊነቱ የተጠበቀ እና ዘመናዊ የመረጃ ልውውጥ መረብ መዘርጋት።
- የቴክኖሎጂ እና አሰራር ቅንጅት (Interoperability)፦ የልዩ ልዩ ሀገራት የጦር ኃይሎች በጋራ ግብረ-ኃይል በሚሰማሩበት ወቅት የቴክኖሎጂ እና የውጊያ አሰራር ቅንጅት እንዲኖራቸው ማድረግ።
- ዘላቂ የአቅም ግንባታ (Sustainable Capacity Building)፦ የአፍሪካ ሀገራት የራሳቸውን የደህንነት እና የሰላም ማስከበር ተግዳሮቶች በራሳቸው አቅም መወጣት የሚያስችላቸውን የረጅም ጊዜ አቅም መገንባት።
የጋራ አዘጋጆቹ ድርሻ እና ስልታዊ ፋይዳ
ኢትዮጵያ እና አሜሪካ ይህንን ጉባኤ በጋራ ማዘጋጀታቸው በሁለቱ ሀገራት መካከል ያለውን የረጅም ጊዜ የደህንነት እና የመከላከያ ትብብር የሚያሳይ ሲሆን በተለይም አፍሪካ አህጉራዊ የደህንነት ስጋቶችን በጋራ ለመመከት ለምታደርገው ጥረት ትልቅ ስልታዊ ፋይዳ እንዳለው ተመልክቷል።
በቀጣዮቹ አራት ቀናት በሚደረጉት ውይይቶች አህጉራዊ የሰላም ማስከበር ግብረ-ኃይሎች አሰራርን የሚያዘምኑ የጋራ ስማምነቶች ላይ ይደረሳል ተብሎ ይጠበቃል።
